واشنگٽن:(ڪلياڻ نيوز ٽي وي) آمريڪا ايران جي ايٽمي معاهدي بابت امڪاني ڳالهين کان اڳ ايران خلاف نئين ۽ سخت پابندين جو اعلان ڪري ڇڏيو آهي۔
پرڏيهي نيوز ايجنسي موجب آمريڪي خزاني کاتي 30 کان وڌيڪ فردن، ادارن ۽ جهازن کي پابندين جي فهرست ۾ شامل ڪيو آهي، جن تي ايراني تيل جي غير قانوني وڪري ۽ هٿيارن جي پيداوار ۾ مدد ڪرڻ جا الزام آهن۔
آمريڪي اختيارين جو چوڻ آهي ته پابندين جو مرڪزي نشانو ايران جي مبينا “شيڊو فليٽ” آهي، جنهن ذريعي ايراني تيل ۽ پيٽروليم شيون عالمي مارڪيٽن تائين منتقل ڪيون وڃن ٿيون. آمريڪا جو موقف آهي ته انهن قدمن جو مقصد ايران جي مالي وسيلن کي محدود ڪري ان جي ايٽمي ۽ عسڪري صلاحيتن کي ڪمزور ڪرڻ آهي۔
آمريڪي خزاني واري سيڪريٽري اسڪاٽ بيسنت چيو ته ايران پنهنجي مالي نظام کي غير قانوني تيل وڪڻڻ، آمدني لڪائڻ، ايٽمي ۽ روايتي هٿيارن جي پروگرامن لاءِ سامان حاصل ڪرڻ ۽ دهشتگرد گروپن جي مدد لاءِ استعمال ڪري رهيو آهي. هن واضح ڪيو ته ڊونلڊ ٽرمپ جي انتظاميه ايران تي “وڌ کان وڌ دٻاءُ” واري پاليسي جاري رکندي۔
صدر ڊونلڊ ٽرمپ بار بار خبردار ڪيو آهي ته جيڪڏهن ايران پنهنجي ايٽمي پروگرام تي ڪنهن معاهدي تي نه پهتو ته آمريڪا فوجي ڪارروائي جو اختيار به استعمال ڪري سگهي ٿو. اسٽيٽ آف دي يونين خطاب دوران به صدر ٽرمپ ايران تي “خطرناڪ ايٽمي عزائم” رکڻ جو الزام لڳايو۔
ٻئي پاسي ايراني صدر مسعود پيشمرگا آمريڪا سان ڳالهين بابت هاڻي لاءِ مثبت اميدن جو اظهار ڪيو آهي، جڏهن ته عالمي برادري ايران–آمريڪا لاڳاپن ۾ ايندڙ تبديلين تي نظر رکي ويٺي آهي۔