حيدرآباد:(ڪلياڻ نيوز ٽي وي) حيدرآباد ايس ايس پي عديل حسين چانڊيو جي صدارت هيٺ پوليس هيڊڪوارٽر ۾ اهم ڪرائم ميٽنگ منعقد ڪئي وئي، جنهن ۾ ضلعي ۾ مجموعي امن امان ۽ ڏوهن جي صورتحال جو تفصيلي جائزو ورتو ويو.
ميٽنگ ۾ سڀني ايس ڊي پي اوز، ايس ايڇ اوز ۽ ٻين لاڳاپيل انچارجز شرڪت ڪئي. اجلاس دوران پوليس جي مجموعي ڪارڪردگي ۽ جاري ڪرائم ڪنٽرول قدمن بابت بريفنگ ڏني وئي.
ايس ايس پي عديل حسين چانڊيو اسٽريٽ ڪرائم، منشيات فروشي، گٽڪا ۽ ننڍن ڏوهن خلاف زيرو ٽالرنس پاليسي تي سخت عملدرآمد جي هدايت ڪئي ۽ چيو ته ڏوهاري عنصرن خلاف بنا ڪنهن امتياز سخت ڪارروائيون ڪيون وڃن.
خصوصي طور تي لسٽڊ منشيات فروشن خلاف ڪارروايون تيز ڪرڻ ۽ ضلعي مان ڏوهاري عنصرن جي مڪمل خاتمي تي زور ڏنو ويو. اشتهاري ۽ مفرور جوابدارن جي گرفتاري لاءِ انٽيليجنس بيسڊ آپريشنز کي وڌيڪ اثرائتو بڻائڻ جون هدايتون پڻ جاري ڪيون ويون.
ايس ايس پي حيدرآباد سڀني ايس ڊي پي اوز ۽ ايس ايڇ اوز کي هدايتون ڏنيون ته پنهنجن علائقن ۾ گشت وڌيڪ موثر بڻائين، شهرين جا مسئلا فوري حل ڪن ۽ عوام سان رابطي کي مضبوط ڪن.