وفاقي وزير صحت مصطفىٰ ڪمال چيو آهي ته ملڪ ۾ نون صوبي قائم ڪرڻ هاڻي ناگزير ٿي چڪو آهي.
ڪراچي جي جيڪب لائن ۾ هيلٿ ڪيئر ڊجيٽل سينٽر جي افتتاحي تقريب ۾ خطاب ڪندي، هن زور ڏنو ته انتظامي نظام کي بهتر بڻائڻ لاءِ صوبا ٺاهڻ لازمي آهن، پر انهن صوبن ۾ به اختيارات نچلي سطح تائين پهچڻ گهرجن.
مصطفىٰ ڪمال وڌيڪ چيو ته پاڪستان ۾ صحت جي صورتحال صرف علاج تائين محدود ناهي، پر ناقص انتظام ۽ وڌندڙ آبادي به اسپتالن تي دٻاءُ وڌائي رهي آهي.
هن ٻڌايو ته ملڪ ۾ هر سال 61 لک کان وڌيڪ ٻارن جي ڄم ٿئي ٿي، پر انهن مان اڃا 4 لک ٻار ويڪسينيشن کان محروم آهن.
وفاقي وزير صحت چيو ته ماءُ ۽ ٻارن جي صحت تي ڌيان نه ڏيڻ سبب 40٪ ٻار مناسب نشوونما حاصل نٿا ڪن، ۽ جيستائين ملڪ ۾ فرٽيليٽي ريٽ 2٪ تائين نه پهچي، ملڪ مڪمل ترقي نه ٿو ڪري سگهي.