سينيٽ جي انساني حقن واري ڪميٽي کي ٻڌايو ويو ته هن وقت 61 ملڪن ۾ 21 هزار 647 پاڪستاني جيلن ۾ بند آهن. گهرو وزارت جي سيڪريٽري ڪميٽي کي ڄاڻ ڏني ته هڪ پاڙيسري ملڪ پاڪستان جي نظام ۾ مداخلت ڪري جعلي پاسپورٽ ٺاهي رهيو آهي، جنهن ۾ ڪرپشن جا به موقعا آهن. ڪميٽي جي چيئرپرسن انساني اسمگلنگ جي وڌندڙ خطرن تي پريشاني ظاهر ڪندي چيو ته ماڻهن کي ان بابت ڄاڻ نه هجڻ ڪري اهي غلط رستن تي هليا وڃن ٿا. هن ايئرپورٽن تي آگاهي وارا بينر نه هجڻ کي به لاپرواهي قرار ڏنو.
چيئرپرسن مطالبو ڪيو ته ايران ۾ قيد پاڪستانين بابت تفصيلي معلومات ڏني وڃي. گهرو سيڪريٽري ٻڌايو ته سعودي عرب مان ڪافي پاڪستانين کي واپس موڪليو ويو آهي، جن ۾ ڪجهه افغان شهري به شامل هئا. هن چيو ته هاڻي 18 کان 20 ڪروڙ پاڪستانين جو ڊجيٽل رڪارڊ موجود آهي، ۽ شناخت جي تصديق فوري طور تي ڪري سگهجي ٿي. ٻاهرين ملڪن ۾ گرفتار ٿيل گهڻا پاڪستاني ننڍن ڏوهن ۾ ملوث آهن.
سيڪريٽري ٻڌايو ته انساني اسمگلنگ جي حوالي سان وزيراعظم جي حڪم تي مختلف ملڪن جا دورا ڪيا ويا آهن. پنجاب جي ڪجهه ضلعن ۾ انساني اسمگلنگ جا گروهه سرگرم آهن، جيڪي نوجوانن کي يورپ موڪلڻ لاءِ لکين روپيا وٺندا آهن ۽ پوءِ انهن کي خطرناڪ رستن تي اڪيلو ڇڏي ڏيندا آهن. ڪيترن ئي پاڪستانين کي ڏکيا ڪم ڪرڻ ۽ غير انساني حالتن ۾ رکيو وڃي ٿو.