لاهور پوليس پاران شهرين کي فريب ڏئي ڦريندڙ 5 رڪني گينگ گرفتار ڪيو ويو آهي جنهن ۾ 3 عورتون پڻ شامل آهن.
ايس پي سٽي جي بيان موجب جوابدار عورت شهرين کي گهرائي نشو ڏيندڙ چانهه پياري غير اخلاقي وڊيوز ٺاهڻ جي ڪوشش ڪئي ۽ پوءِ رقم وصول ڪئي.
تحقيقات جي مطابق جوابدار عورت متاثر شخص جي ڪارخاني ۾ ڪم ڪندي هئي ۽ قرض جي رقم واپس وٺڻ جي بهاني کيس گهر گهرايو.
گينگ جي ٻين ميمبرن پڻ غير اخلاقي وڊيوز جي ڌمڪي ڏئي وڌيڪ 5 لک روپين جو مطالبو ڪيو، جنهن تي پوليس فوري ڪاروائي ڪندي جوابدارن کي گرفتار ڪري ورتو.
گرفتار جوابدارن کان نقدي، موبائيل فون ۽ وڊيوز هٿ ڪيون ويون آهن، جن کي ثبوت طور ڪيس ۾ شامل ڪيو ويو آهي، پوليس جوابدارن خلاف قانوني ڪاروائي شروع ڪري ڇڏي آهي.
ايس پي سٽي شهرين کي اپيل ڪئي آهي ته اهڙي قسم جي فريب ۽ ڌمڪين کان هوشيار رهن ۽ ڪنهن به مشڪوڪ سرگرمي جي اطلاع فوري طور تي پوليس کي ڏين.